Muu Herri Ekimenaren balorazioa

Ekainaren 3an Zestoako herriak, askatasun osoz, guk proposatutako aurrerapausoa ez ematea erabaki zuen. Hori izan da herriaren hitza eta erabakia, eta horrela onartzen dugu.

Bigarren irakurketa bat eginaz eta geureari begiratuta, ezin dugu ahaztu 542 pertsonek ezezkoa eman diotela zekorketei eta epe luzeko prozesu batean lorpen garrantzitsu baten moduan ikusten dugu. Zestoako zekorketak betebehar historiko eta betiko izatetik, aukera eta etengabe eztabaidagarriak izatera pasa dira.

Bestalde, oso pozik gaude egin dugun bidearekin: nola ez gara ba pozik egongo, atzera begiratu eta lan bikain bat baino ikusten ez dugunean? Modu lasaian bultzatu dugu elkarrizketa, fidelak izan gara argudiaketa bidez jendea konbentzitzeko estiloari, eta une oro jarrera eredugarria agertu dugulakoan gaude. Gu seguru gaude arrazoiketak eta kontzientziazioak eramango gaituela mota honetako ikuskizunen amaierara. Denbora kontua besterik ez da.

Bukatzeko, eskertu nahi genieke bereziki gure mezua zabaltzen lagundu diguten guztiei, aurpegia jendaurrean eman duten guztiei, kalean iritzia eman dutenei eta bukatzeko, noski, "odolik gabeko festa batzuen alde" eskaera eman duzuen guztioi: eskerrik asko bihotz bihotzez!

Muuxu bana guztioi!

Erabaki ala inposatu?

Herriko festetan zekorketak egin edo ez egin erabakitzeko momentu hauetan zezenzaleak beldurraren diskurtso bat garatzen hasi dira.

Sorrarazi nahi diguten lehen beldurra: “nor zara zu guri zekorketak kentzeko?”. Zestoako zekorketak guztion ondare dira, eta gure herriko festetan ordurik onenak eta lekurik onenak bete dituzte gaur arte. Nork eskatu du hau? Nork inposatu du?

Ikusle kopuruaren pisua jarri digute mahai gainean, baina ikus ditzagun sarrerako datuak: 1980an 700 ikusletik gora ziren, eta suposatzen dugu beste batzuk egongo zirela beste zerbait egotearen alde. Gaur egun 400 ikusle pasatxo izaten dira, beraz ikusleen zati handi batek erabaki du ez duela joan nahi. Eta oraindik ere zekorketak ikustera joaten direnek bakarrik erabaki behar al dute? Oraindik ez da momentua, eta noiz? 4 ikusle daudenean, 4 hauei galdetuz gero ez da momentua izango.

Beraz ez sentitu inposatzaile, beraiek dioten bezala, herriak nahi badu ez da inposaketa. Eta ez badu nahi, erabaki demokratiko bat da, eta joko demokratiko orotan bezala, gehiengoaren nahia jarriko da gutxiengoaren nahiaren gainetik. Hori inposaketa da? Ez dugu uste.

Bestalde, gai etikoen inguruan, nahiz bestelako gaien inguruan, ardura politikoa duten herritarrek, herriaren ordezkari direnek, zilegitasuna dute arau etikoak nahiz bestelakoak inposatzeko guztion elkarbizitza hobetzeko. Erabaki politikoa da haurdunaldi bat moztu nahi duen emakumearen eskubidea lehenetsi, edo sortu berri den gizakiaren bizitza eskubidea lehenetsi erabakitzea. Edo nahi gabeko haurdunaldia moztea diru publikoz lagundu edo ez. Arau etikoak egiteko ardura izateaz gain, politikoek festak antolatzeko ardura ere badute, beraz, zilegia, koherentea, eta beharrezkoa litzateke udalak sinatutako legeak inposatzea. Hala nola “Animalien Eskubideen Adierazpen Unibertsala”.

Inposaketaz hitz eginaz, aipatu nahi genuke, zezenketazaleak egiten ari diren xantaia  ere. Beraiek herriko giroa ez gaiztotzearen alde daudela diotenean, argi dago zekorketak egitea utziz gero erabaki honen alde gaudenak ez dugula liskarrik sortuko. Are gehiago esango genuke, Muu Herri Ekimena ekintza guztietan herritar guztiak errespetuz tratatzen saiatu da. Ez dugu hitz zakarrik, irainik edo deskalifikaziorik egin. Horregatik harro gaude gure ekintzez. Eta beti jarraituko dugu gure lagunen ondoan, nahiz eta zekorketak gustuko izan askok, eta oraindik ez ulertu ez egitearen zergatia. Errespetuzko erantzun bera espero dugu bueltan.

Ez erori beldurraren mehatxuan, guztiok maite ditugu festak, egin ditzagun guztiontzat festak!!

Mikel Odriozola Larrañaga

Hainbat talde eta elkartek atxikimendua eman diote gure lanari

Behean sinatzen dugun elkarte eta taldeek, Muu Herri Ekimenak azken hilabeteotan "Odolik gabeko festen alde" egindako lana sostengatzen dugu eta ekainaren 3an Zestoan izango den eskaera jasoketan "Zekorketak EZ antolatzeko" eskatzera animatzen zaituztegu.

- A.D.D.A. (Asociación Defensa Derechos Animal)

- A.T.E.A. (Asociación para el Trato Ético con los Animales)

- Eguzki

- A.V.A.T. (Asociación de Veterinarios Abolicionistas de la Tauromaquia)

- Ekologistak Martxan

- C.A.S. International (Comité Anti Stierenvechten)

- La Tortura No es Cultura

- Anima Naturalis

- A.N.D.A. (Asociación Nacional para la Defensa de los Animales)

Aurrera pausoa denontzat

Zure papeleta hartu eta iritzia eman aurretik, minutu bat eskatzen dizugu, galdera honi erantzuteko:

Animalia torturatu eta ezpataz akabatzen ikustea... beharrezkoa al dut nik ondo pasatzeko?

10 arrazoi zekorketarik gabe aurrera egiteko

• Festa eta alaitasuna elkarrekin doazelako.
• Herriko festen ikurra barrerak direla eta ez ezpata eta odola aldarrikatzeko.
• Sentsibilitate desberdina dutenen parte parte hartzea bermatzeko.
• Adin guztietako herritarrak gure festetan parte hartzera harrotasunez gonbidatzeko.
• Aintzinatik datorren festa egokitu eta eguneratzeko.
• Anbientea eta giro ona herritarren esku dagoela frogatzeko.
• Elkarbizitza eta errespetuan oinarritutako kultura bultzatzeko.
• Zatiketaren gainetik, plaza, festetako elkargune bihurtzeko.
• Belaunaldi berriei aurrera begiratzeko aukera eskaintzeko.
• Oraingo herritarrok, orain nahi ditugun festak antolatzeko.

Taurinoen baieztapenek zalantza eta galdera asko sortzen dizkigute

"Zestoa eta zezenak maite ditugulako, zezenei bai esateko arrazoiak" 

Zezenak maite eta ondo pasatzeko zezenak hil? Zezenak ala zezenketak?

"herritarrek hala nahi dutelako"

Zeintzuk dira herritarrak, zekorketetara joaten direnak bakarrik?

"errespetua merezi..."

Zezenek ez al dute errespeturik merezi? Ikuskizun honekin ados ez gaudenok ez al dugu errespeturik merezi?

"inposaketaren kontra"

Herritarren iritzia kontuan hartuko duen prozesua inposatzailea al da? Beti egin dena zalantzan jartzea inposaketa al da?

"elkarbizitzagatik"

Elkarbizitza ez al da eskubideen gainean eraikitzen? Zezenen tortura eta heriotzean oinarritzen den ikuskizuna elkarbizitzarako balio positiboa al da?

"gehitzea nahi dugu, ez kentzea"

Orain arte zekorketak arrazoitzeko beste ikuskizun eta ekintzak gutxiestea ez al da izan zuen jarrera? Orain arte zekorketen orduan beste ikuskizuna jartzea ez al duzue kritikatu?

"zatitutako festa ozpinduak baino..."

Zekorketak kentzeko jarrera nagusitzen bada, ozpindu egingo zarete? Zatiketa bultzatuko duzue? Orain arte hala egin al da? Zerk bereizten gaitu festetan? Ze koadrila ez da bereizten batzuk zekorketetara joateko, eta zekorketa amaitzean berriz elkartu?

"zezenak gure herriko zati garrantzitsua"

Eta herritarrak? Ez al gara herritarrak festen zati garrantzitsuena?

"beren burua ordaintzen dutelako"

Nork ordaintzen du ukuiluaren muntaia? Kamioitik ukuilura sartzeko pasabidea? Asegurua?...

"herriko festak maite ditugulako..."

Odolik gabeko festen alde egotea ez al da festak maitatzea?

Oharra: azken asteotan zekorketen aurkako ideiak zabaltzen diharduten bi blog anonimo sortu dira. Euskaraz bata, eta euskaraz irakurtzeko zailtasunak dituztenentzat, gazteleraz bestea. Eman ingurukoei blog hauen berri; pentsatu, hausnartu... eta animatuz gero, parte hartu!

Bideoa gaztelerazko azpitituluekin

Gazteleraz azpititulatu dugu pasa den astean etxez etxe banatu genuen bideoa. Denbora arazoak medio, ezin izan genuen banatu aurretik egin. Hemen duzue bideoa:

Lehen zatia

Bigarren zatia

Hirugarren zatia

Muu bideoa

Zekorketen aurka dauden herritarren iritziak bilduz, Muu Herri Ekimenak egin duen bideoa.

Lehen zatia

Bigarren zatia

Hirugarren zatia

Ikus-entzun eta hausnartu!!

Laister ikusgai...

Muu Herri Ekimena egiten ari den bideoaren laburpena duzue honakoa. Laister izango duzue ikusgai!

Ekainaren 3an, eman ezezkoa zekorketei!

Muuuuu

Ikus dezakezue zestoarren sormena, jende berritzailez betetako herri honek duen gaitasunaren erakusle. Zezenketen kultura sadiko eta zaharra berritzeko dagoen beharraren adibide. Eskerrik asko gaztiak, kantu bikaina, alaitasunez betea, guk nahi ditugun festak bezala.

Kanta hau ere gure mezuaren mezulari izan dadila aste hauetan, eta ilusiozko oroitzapenen gordeleku etorkizunean.

Maiatzaren 9ko prentsaurrekoan azaldu bezala, 1+1=2 kanpainaren helburu argi bat dauka, zekorketen kontrako eskaerak lortzen jarraitzea. Badakigu benetan gertuko jendeak guztiongan duen eragina. Horregatik, gure adierazpena sinatu, edo zekorketak egitearekin ados ez zaudeten guztion inplikazioa nahi dugu. Zure inguruan, konfidantzan eta giro lasaian, zure ikuspuntua azaltzea erabakigarria dela uste dugulako.

Beraz zuetako sinatzaile bakoitzari, sinatu ez duen pertsona baten eskaera lortzeko erronka proposatzen dizuegu. Horrela, sinatzaile bakoitzeko bi eskaera izango dira.

Inplikazioa zabalduz, aurpegiak erakutsiz, bakoitza bere etxean, bere kuadrilan. Borondate onez eta ilusioz egin dezagun lan. Ahalik eta zestoar gehienak aldaketa nahi izatea, eta aldaketa ulertzea lortu behar dugu. Mugarik gabe, zenbat eta kontzientziazio handiagoa, hobe. Beraz, hasi ingurukoekin hizketan, informazioa trukatzen, pentsatzen, bide honetatik etorriko baita kontzientziazioa. Gu saiatuko gara ideia berriak zabaltzen eta eztabaidarako argudioak ipintzen. Baina ikuspuntu berriek ere osatu ditzatela gure hitzak, zenbat buru hainbat aburu, eta guztiak osagarri.

Festen etorkizunaz kezkatuta daudenak entzun eta ulertu; normala da kezka, baina aukerarik uzten badu, erakutsi zure ikuspuntua. Aldatzeak beti sortzen du kezka. Baina, ziur gaude, hemen giroa eta anbiente ona pertsonok jartzen dugula.

Bukatzeko, gure konbentzimendua, gure ustea, gure pentsamendua, gure ondorioak zabaldu ondoren, iritsi dadila galdeketa eta herriak erabaki dezala. Eskatu ez torturatzeko, eskatu ez sufriarazteko, zentzuzko eskaera da! Ilusioz beteta, eskatu!  

1 + 1 = 2

Prentsaurrekoa asteazkenean, maiatzak 9, arratsaldeko zazpietan plazan.

Zekorketen inguruko eskaera-jasotze prozesuaren nondik norakoak

Zekorketei buruzko eskaera-jasotze prozesua abian jartzeko asmoz, atzo bilera zabal bat egin zen Kultur Etxean, udalak deituta. Bertan, udalak eratu duen batzordeak orain arte hartutako erabakien berri eman zuten udaleko ordezkariek, eta galdera eta iritziak emateko aukera ere egon zen. Hainbat punturen inguruko argibideak eman ziren. Hemen zerrendatuko ditugu, herritarrentzat interesgarriak direlakoan:

• 18 urtetik gora izan eta Zestoan erroldatuta daudenek parte hartu ahal izango dute deialdian.
• Boto eskubidea dutenen %33ak hartu beharko du parte, emaitza loteslea izan dadin. Boto baten aldea nahikoa izango da baietzak edo ezetzak irabazteko.
• Ekainaren 3a izango da eskaerak jasotzeko eguna, eta goizeko 9:00etatik iluntzeko 20:00ak arte egongo dira mahaiak zabalik (Zestoan bi mahai, Arroabean, Arroagoian, Aizarnan eta Iraetan). Eskaera postaz egiteko aukera ere izango da, eta horretarako prozedura zehaztuta dago.
• Eskaerak:

Zestoan zekorketak ez antolatzea  *Udalak ez du parte hartuko zekorketen antolakuntzan, ez du plaza utziko horretarako eta ez die babes legalik emango.
Zestoan zekorketak antolatzea  *Udalak plazako azpiegiturak jarriko dizkio eta babes legala emango dio zekorketak antolatzen dituen taldeari.
Zekorketa hitzaren esanahia: Zezena edo zekorrari, banderillak sartzen zaizkion eta ezpatarekin hiltzen den ikuskizuna.

Ofizialki, datorren ostegunean, hilaren 26an, jarriko da prozesua martxan, egun horretan izango den osoko bilkuran onartuko baitute. Batzarra 20.00etan izango da, udaletxeko pleno aretoan. Nahi dutenei, bertaratzeko deia luzatzen diegu.

Nobilladei buruzko eskaera-jasotzea abian jartzeko bilera zabala‏

Udaletxeko galdeketa edo kontsulta arautzeko bilerak bukatu dira. Bildu, EAJ eta Muu-ren parte hartzearekin akordio batera iritsi gara galdera, data eta prozeduraren inguruan (zezenketazaleak bilera guztietara gonbidatuak izan dira, baina lehenengora bakarrik etorri dira. Akta guztien berri izan dute, baina ez dute inolako iritzirik azaldu gai hauen inguruan).

Udaletxeak bilera zabal baterako deialdia egin du apirilaren 22rako (bihar, astelehena), arratsaldeko 20.00etan, Kultur Etxean. Iritzia azaldu nahi duten herritar guztiei irekia da, eta bertan akordio hauek eztabaidatu eta berrikusteko aukera izango da. Ondoren osteguneko plenoan definitiboki onartuko da udalaren gehiengoak hala nahi badu.

Bilera zabal honetara joateko deia luzatzen dizuegu joan nahi duzuen guztioi, erabakien nondik norakoak jakin eta iritzia azaltzeko.

Zezenketazaleek, lehen bileraren ondoren, eztabaida mahaia utzi dute

Herritarrak, zezenketen inguruko galdeketaren aurrean garrantzia duen gertakari zehatz batez ohartarazi nahi ditugu. Jarrera honek errealitatea nahastu ez dezan eta etorkizunekoak ahalik eta gutxien baldintzatu ditzan.

Martxoaren hasera aldera udalak zezenketak antolatzen dituztenei zein Muu herri ekimeneko kideei dei egin zigun bilera batzuen bitartez galdeketaren nondik norakoak ezartzeko. Lehenengo bileran zenbait puntu ezarri ziren, hurrengo asterako alde bakoitzak bere iritzia eraman zezan, hala nola: gutxieneko parte-hartzea, galdera zein izango den, data, baiezkoaren eta ezezkoaren esanahiak… Baina zezenketazaleek egun apur batzuetara jakinarazi zuten ez zirela gehiago bileretara joango, galdeketa arautzeko mahaia zezenketen aldeko ordezkaritzarik gabe utziaz. Eztabaidak hasi baino lehen erabaki hori hartzeak nahiko harrituta utzi gaitu.

Guztion hausnarketak partekatu eta herritarrei eskatu beharreko iritzia ahalik eta modu zabalenean adostea aberasgarria delakoan gaude. Beraz, ulertezina egiten zaigu honelako jarrera agertzea.

Guk bileretan parte hartzen jarraituko dugu eta behar diren konpromisoak hartuko ditugu gauzak ondobidean eta gardentasunez joan daitezen. Dena den, Zestoan zezenketen alde daudenei dei eginaz amaitu nahi dugu. Gure ustez, galdeketa antolatzerakoan interesgarria da alde guztiak bertan ordezkatuta egotea.

Muu Festa gaztetxean

Muu Herri Ekimenak antolatuta, bi taldek kontzertua emango dute gaur gauean Zestoako gaztetxean.

Gaztetxeko kontzertuen kartela

Mondocane talde azpeitiarra eta Buffalo talde zarauztarra igoko dira oholtza gainera. Kontzertuak gaztetxean izango dira, 22.30etatik aurrera.

Odolik gabeko festak posible direlako, animatu eta parte hartu!

Bizikleta martxa II

Larunbatean, martxoak 24, bizikleta-martxa egin zen odolik gabeko festen alde. 

Arratsaldeko lauretan Zestoako plazatik irtenda, Iraetatik pasaran, futbol zelaian buelta eman genuen, partidu bat jokatzen ari baitziren bertan. 

Iraetatik Arroagora jarraitu genuen, eta bertan egin genuen lehen geldialditxoa (aldapa gogorra da hura, eguzki galgatan egiteko). 

Egonalditxoa egin, eta arnasa berreskuratu bezain laster, Arroaberainoko bidea egin genuen, eguraldia lagun.

Arroabera iritsita, zain geneuzkan sagar, laranja eta ur boteilak, merienda-paxara egin eta indarrak berreskuratzeko. 

Ondoren, klarionak hartu eta Arroabeko plazan gure zezentxoa eta lema marraztu genituen.

Arratsaldeko sei t'erdiak aldera atera ginen Arroabetik, Zestoaruntz bueltan, eta zortzietarako hemen geunden. Bide guztia "odolik gabe, askoz hobe" lema abestuz egin genuen, furgonetan zihoan speakerak animoak ematen zizkigun bitartean.

Arratsalde pasa polita izan zen!

Bizikleta martxa

Datorren larunbaterako, martxoak 24, bizikleta martxa antolatu du Muu Herri Ekimenak. Ikuskizun odoltsuekin amaitzeko urrats bat izan nahi du ekitaldiak; haur, heldu, gazte... guztien neurrirako plana da, familia giroan egiteko modukoa.

Arratsaldeko 16.00tan abiatuko gara Zestoako plazatik, musikaz lagundurik. Iraetatik pasa, Arroagora igo, eta Arroa Errekatik pasatuz Arroabera joango gara. Arroabean egonalditxoa egin, eta Zestoaruntz itzuliko gara.

OHARRA:

umeentzat, nekatzen direnentzat, izerdirik bota nahi ez dutenentzat... FURGONETAK EGONGO DIRA aldapak gainditzeko.

Puntu batzuk argituz

Landutako gaien inguruko zenbait puntu sakontzeko beharra ikusi dugu, eta hemendik aurrera tarteka puntu batzuk sakonduta argitaratuko ditugu blogean. Gaurkoan lehen puntua:

Barrerei buruz

MUU herri-ekimena ez da barreren alde egiteko mugimendu bat, ezta kontra egitekoa ere. Hasieratik garbi utzi nahi izan duguna da barreren eztabaidak ez duela zerikusirik zekorketen eztabaidarekin. Nolanahi ere, garbi dago barrerak gure ondare historikoaren atal garrantzitsua direla. Bestalde, argi dago barrerek zerbitzu bat ematen dutela zekorketarik ez dagoenean ere, harmaila moduan funtzionatzen dute herriko beste hainbat ikuskizunetan. Hori horrela da gaur egun eta horrela izan da historian zehar ere. Eztabaidatu daitekeena da garestiak izan daitezkeela, segurtasun aldetik akatsak dituztela, harmaila prefabrikatu batzuk, agian, merkeagoak liratekeela... Baina hori guztia horrela izan da orain arte ere. Merkeagoa eta seguruagoa izango litzateke, agian, zekorketak metalezko barrera prefabrikatu batzuetan egitea ere. Dena den, barrera horiek sentimendu berezi bat sortzen dute Zestoan eta horregatik mantentzen dira. Beraz, logikoena iruditzen zaigu zekorketekin barrera horiek jartzearen alde dagoena zekorketarik gabe ere hala egotea. Ez dugu onartuko esatea “zekorketak kenduta barrerak kenduko dira eta, barrerak kenduta festak ez dute xarmarik”. Oso irakurketa interesatua da hori. Barrerekin egingo dena herriak erabakiko du, orain arte erabaki duen bezala eta, haien etorkizuna ez dago zekorketa-zaleen kasketa baten eskuetan.

Norbait barrerak kentzearen alde badago saiatu dadila talde bat edo mugimendu bat sortzen, ea jendeak jarraitzen dion. MUU ez zen horretarako sortu.

Zekorketen inguruko eztabaida Euskadi Irratian

Zekorketen inguruan egingo den herri-galdeketa dela eta, Euskadi Irratiko Mezularia saioak heldu zion gaiari otsailaren 28an. Leire Etxeberria alkateak hitz egin zuen aurrena, eta ondoren Aitor Gonzalez Zestoako Zezenzale Elkarteko kideak, eta Mikel Odriozola Muu Herri Ekimeneko kideak talde bakoitzaren jarrera eta ildoa argitzeko aukera izan zuten. EITB Nahieran orrialdean dago entzun gai, egin klik lotura honetan:

Mezularia saioa, otsailak 28

Zekorketen gaia oihartzuna hartzen

Parte-hartze araudiaren zirriborroa aurkeztu eta aste betera Berria TBk eta Gipuzkoako Hitzak zekorketei heldu diete. Lehenengoak datorren udaberrian Zestoan egingo den herri-galdeketaren inguruko bideo-erreportaje bat egin du, eta Muu! herri ekimeneko eta zezenketak antolatzen dituzten taldeko ordezkariei eman die hitza. Hona hemen Zezenketen etorkizuna herritarren esku izeneko erreportajerako lotura.

Gipuzkoako Hitzak ikuspegi orokorrago batetik landu du zekorketen inguruko gaia, eta hauen beherakadaren arrazoiak ematen saiatu da, zezenketazale eta zezenketen kontrakoen iritziak bildu, Zaletasun faltaren ondorioz, zezenketak gutxitzen ari dira izeneko erreportajean


Parte-hartze araudiaren inguruko informazioa nahi duenarentzat Zertanao.info eta Zestoako Hitzan argitaratu ziren albisteak. Zestoako Udalaren webgunean dago parte-hartze araudiaren zirriborroa eskegita, eta otsailaren 16ra bitartean ekarpenak aurkezteko epea zabalik dago.

Kritikei erantzunez, gardentasunez

“Amparo, la que baila con el toro”-k bere blogean Muu herri-ekimenari buruz plazaratutako kritika bidegabeei erantzun nahi diegu. Gure lana publikoa eta gardena dela azpimarratzeaz gain, anonimotasunaren babesean luzaturiko gezurrak gezurtatu nahi ditugu. Honen aurrean garbi ditugun hainbat ideia edo arau argitu nahi ditugu:

1.- Muu herri-ekimena Zestoan zekorketak kentzea nahi dugun norbanakook osatzen dugu. Helburu honekin bat egiten duen herritar orori irekia da gure ekimena. Bertan parte hartu nahi duen edonork ateak zabalik ditu eta ongi etorria izango da. Horretarako, aurkezpen egunean adierazpenarekin bat zeudenei gure taldera batzea eskaini genien.

2.- Talde honetako pertsona bakoitzak bere burua ordezkatzen du. Bestelako egitura sozial, kultural, edo politikorik ordezkatu gabe.

3.- Talde honek ideia komun batzuk defendatzen ditu, gure adierazpenean agertzen direnak. Gainontzeko guztian, norbanako bakoitzak bere pentsaera eta jarrerak ditu bizitzaren aurrean. Muu-ko partaide ezberdinok herriko beste taldeetan izan ditzakegun harreman eta partaidetzak pertsonalak dira eta ez dute inolaz ere talde honetako lana baldintzatzen.

4.- Taldeko partaideok, Zestoan zezenketak kentzeko ekimen batzuk adostu ditugu.
- Komunikazio bide guztiak erabili nahi ditugu, zestoarron kontzientziatara iristeko.
- Komunikazio bide egokienak gertukoak direla uste dugu, beraz, norbanako bakoitzak bere inguruan pertsonalki egin dezakeen lana oso garrantzitsua da guretzat.

5.- Muu alderdikerien gainetik dago. Alderdi ezberdinen interesetatik at lan egin dugu eta egiten jarraituko dugu. Sentsibilitate politiko jakin batekin lotura zuzena dugula salatzea gezurretan aritzea da, benetako eztabaida ekiditea eta maltzurkeriaz jokatzea. Zekorketez eta animalismoaz gaindiko gai politikoetan gure inpartzialtasuna mantenduko dugu.

6.- Gure ekintzen finantziaziorako erabili ditugun diru-iturriak ondorengoak izan dira:.
- Lehen donazioa Z.A.T. (Zezenketen Aurkako Taldea), 200 euro pasatxo.
- Laguntza-bonoak atera ditugu, eta taldekide bakoitzak bere inguruan aportazioa egin nahi dutenei saldu dizkie. Oraingoz 350 euro jaso ditugu. Oraindik gehiago jasotzeko asmoa dugu.
- Beste zenbait diru sarrera aztertzen ari gara.

7.- Herrian gure adierazpena zabaltzeko egin berri dugun “buzonada” horren kostua 205 eurotakoa izan da.

8.-Zezenketen inguruko eztabaida desbideratu, lainotu, zikindu eta politizatu nahi duen orori talde honekiko errespetua eskatzen diogu. Irainduak sentitzen gara. Ez gaude prest gure taldekideei inongo betorik onartzeko.

9.- Gure helburua bete artean lanean jarraitzeko asmoa dugu. Zezenketei buruzko herri galdeketan gure posizioa ahalik eta indartsuena izan dadin herritarrengana zuzendu nahi dugu. Hori bai, garbi jokatuz, herritarren artean ahalik eta zatiketa txikiena eragiteko ekimenak bideratuz eta herriko zezenketazaleek merezi duten begiruneaz arituz. Guk ere berdina eskatzen dugu trukean, besterik ez.

10. Hori bai, herritar guztioi jakinarazten dizuegu, ez dugula utziko Muu tresna politiko bezala erabiltzen, ez eta propaganda partidistarako tresna bezala ere. Zekorketez eta animalismoaz gaindiko gai politikoetan gure inpartzialtasuna mantenduko dugu. Inpartzialtasun hau mantentzen laguntzeko jarrera duten guztiak ongi etorriak dira, adierazpenarekin ados badaude edo, gutxienenez, odolik gabeko festen aldeko jarrera badute.  Minduak sentitzen gara “badakigu nor dauden honen atzean” entzutean. 

Atxikimendu bila

Aste honetan buzoneoa egin dugu Zestoan gure dekalogoarekin, jendeak, argi eta garbi izan dezan zein den Muu Herri Ekimenaren mezua eta aldarrikapena. Asteburu honetan zehar sinadura biltzen arituko gara herrian, goiz eta iluntze, puntu desberdinetan. 

Dekalogoan diogunarekin ados baldin bazaude, eta zekorketak kentzearen aldekoa baldin bazara, irten kalera eta eman zure sinadura! (ez ditugu sinadura ematen duten pertsonen izenak publikoki inon jarriko, erreferendumean zenbat izango garen jakitea da xedea.)

Auzoetan auzotarrek egingo dute sinadura bilketa, hurrengo astetik aurrera.

Zekorketarik gabeko festa ederrak egin ditzakegulako, odolik gabeko festen alde!

Udalak zezenketen inguruko herri galdeketa egitea onartu du aho batez

Pasa den abenduaren 22ko ezohiko batzarrean onartu zenaren arabera, zezenketen inguruko herri galdeketa egingo da. Bilduk aurkeztu zuen mozioa, eta aho batez onartu zuten.

Mozioaren laburpena Diario Vasco eta Zertanao.info webguneek argitaratu zuten.

Abenduaren 26an, S/Zoro Peri egunean, ETB 1eko Arratsaldero saioan Zestoako zezenketen gaia atera zuten. Estekak bideora egiten du lotura, bertan, 2 ordu eta 30 minututik aurrera hasten dira zezenketen inguruan eztabaidatzen.

Circo del Sol-ekoek lortu dute animaliarik gabeko espektakulo itzel bat. Zestoarrok ere lortuko dugu!